Cyfarpar Labordy Ail Law

Hyd yn oed os oes gan y cyfarpar farc CE, peidiwch byth â chymryd yn ganiataol ei fod yn ddiogel. Dylai'r llawlyfrau a ddarperir gan y gweithgynhyrchwr gynnwys:

1. Darluniau o'r peirianwaith a'i gylchedau rheoli
2. Y manylebau a'r safonau a ddefnyddiwyd wrth ei ddylunio
3. Canlyniadau profi perthnasol a data arall
4. Cyfarwyddiadau gweithredu
5. Adroddiadau technegol

Sylwer, yn ôl PUWER, nid yw prynu peirianwaith ail law yn wahanol i brynu cyfarpar newydd.

Mae peirianwaith ail law yn newydd i'r sefydliad, felly bydd angen iddo fodloni'r un gofynion â chyfarpar newydd.

Gall hen gyfarpar fod mewn cyflwr gwael.

I raddau helaeth, bydd cyfarpar ail law yn hen. Cymharwch fersiynau hŷn a rhatach â'u fersiynau diweddarach; a fydd arbed arian yn bwysicach na gwell cynhyrchiant ac effeithlonrwydd model newydd? Yn ogystal, gall hyn olygu hefyd fod y cyfarpar rydych yn ei brynu mewn cyflwr gwael, a fydd yn arwain at gostau ychwanegol os bydd angen ei atgyweirio ar ôl iddo gyrraedd. Mae'n bosib na fydd cydrannau sbâr ar gael, felly ni fydd modd ei atgyweirio. Mewn llawer o achosion, mae gweithgynhyrchwyr yn newid eu dyluniad bob pum mlynedd, felly ni fydd cydrannau'r cyfarpar newydd yn gydnaws â’r hen gyfarpar er y gallant ymddangos yn debyg.

Mae llawer o gyflenwyr a ffynonellau cyfarpar labordy gan gynnwys:

1. Gweithgynhyrchwyr OEM sy'n gallu cynnig cyfarpar ail law (cyfarpar arddangos fel arfer) sydd ar werth â gwarant lawn.

2. Gwefannau arwerthiant ar-lein megis ebay - nid yw polisi'r brifysgol yn cefnogi prynu cyfarpar o'r platfformau hyn oherwydd nad yw'r cyfarpar wedi'i brofi fel arfer, nid oes ganddo lawlyfrau na gwarant a gallai fod yn beryglus.

3. Cyflenwyr trydydd parti - dyma gwmnïau sy'n arbenigo mewn darparu cyfarpar labordy ail law. Pethau i'w hystyried wrth ddewis y llwybr hwn:

a. Mae rhai gwerthwyr yn cynnig gwarantau gyda'u cyfarpar, ond gwiriwch delerau'r rhain - mewn rhai achosion, dim ond credyd gaiff ei gynnig os bydd cyfarpar yn ddiffygiol, yn hytrach nag ad-daliad llawn neu atgyweirio.

b. Gofynnwch am weld y cyfarpar yn cael ei arddangos. Mae'n rhaid i chi weld y cyfarpar yn cael ei brofi'n llawn a bydd cyflenwyr gwell yn fwy na hapus i anfon fideo o arddangosiad.

c. Darllenwch adolygiadau a gofyn am eirdaon: rydych chi eisiau bod yn dawel eich meddwl bod y cyflenwr yn ddibynadwy. Gofynnwch am farn pobl a gwneud eich ymchwil cyn ymrwymo i ddim

d. Gofynnwch am hanes y cyfarpar: Gofynnwch i'r gwerthwr am unrhyw broblemau hysbys gyda'r cyfarpar. Oes unrhyw hanes o waith cynnal a chadw gan y peiriant i ddangos ei fod wedi cael ei gynnal a'i gadw'n iawn?

Sylwer, os ydych chi'n ystyried prynu cyfarpar ail law neu gael gwared â hen gyfarpar, cysylltwch â'r Tîm Cydymffurfiaeth:

• Max Tolley - 01792 604460
• Carl Roberts - 01792 295275
• Greg Barber - 01792 602238

Mae'r Brifysgol wedi llunio dogfen i roi gwybodaeth ac arweiniad clir i staff  i'w galluogi i gael gwared â chyfarpar arbenigol a'i werthu.

Canllaw Syml yr HSE ar Ddarparu a Defnyddio Offer Gwaith Rheoliadau 1998

Canllawiau'r HSE ar Ddefnyddio Offer Gwaith yn Ddiogel

Canllawiau'r HSE ar Brynu Peiriannau Newydd