Ar y dudalen hon, gallwch ddod o hyd i drosolwg o beth yw Camymddygiad Academaidd, ynghyd ag amrywiaeth o Gwestiynau Cyffredin am yr hyn sy'n digwydd pan godir pryderon ynghylch uniondeb academaidd myfyriwr.
Mae'r atebion i'r cwestiynau cyffredin hefyd yn cynnwys dolenni defnyddiol at adnoddau a chymorth perthnasol.
Mae'n hollol ddealladwy i deimlo'n bryderus neu'n ofidus wrth ddelio ag unrhyw agwedd ar gamymddygiad academaidd posibl; mae llawer o fyfyrwyr yn gweld y broses hon yn straenus, yn enwedig os nad yw wedi digwydd iddynt o'r blaen. Mae'r cwestiynau cyffredin isod yn egluro beth mae'n ei olygu os cewch lythyr yn eich hysbysu bod honiad o gamymddygiad academaidd wedi'i wneud, beth fydd yn digwydd nesaf, a ble gallwch gael cymorth.
Os hoffech ddarllen y rheoliadau ffurfiol llawn, maent ar gael ar wefan Prifysgol Abertawe:
Gweithdrefn Camymddwyn AcademaiddGellir gweld y diffiniad llawn drwy'r ddolen hon: Diffinio uniondeb academaidd a chamymddygiad academaidd adran 1.
Mewn achosion sy'n ymwneud â gwaith cwrs neu aseiniadau ysgrifenedig, traethawd hir neu draethawd ymchwil, mae hyn fel arfer yn cynnwys y canlynol.Am fanylion mwy penodol a rhestr fwy cyflawn, cyfeiriwch at y rheoliadau:
Un o'r pryderon mwyaf cyffredin yw Llên-ladrata. Mae llên-ladrata yn digwydd pan fydd rhywun yn defnyddio geiriau, syniadau neu waith rhywun arall heb gydnabod y ffynhonnell yn glir. Gallai hyn olygu copïo testun heb ddefnyddio dyfynodau, ail-eirio heb gyfeirio at y ffynhonnell, neu ddefnyddio deunydd o'r rhyngrwyd heb ei nodi. Weithiau, mae myfyrwyr yn llên-ladrata ar ddamwain oherwydd eu bod yn ansicr ynghylch y rheolau cyfeirio, ond gellir trin hyd yn oed llên-ladrata anfwriadol fel camymddygiad academaidd.
Sylwer, yn achos hunan-lên-ladrata, sy'n digwydd pan fyddwch yn defnyddio darn o waith a gyflwynwyd gennych gynt ar gyfer gwaith cwrs neu arholiad cyfredol, h.y. defnyddio'r un gwaith ddwywaith. Er nad yw hyn yn cael ei ystyried yn gamymddygiad academaidd yn yr ystyr ffurfiol; ystyrir hyn yn arfer academaidd gwael a chaiff ei drin drwy'r broses farcio, gan arwain fel arfer at farc is.
Mae gwybodaeth am gamymddygiad academaidd, ynghyd â chanllawiau ar gyfeirnodi ac arferion academaidd da, ar gael i fyfyrwyr yn y Llawlyfrau a’r Canllawiau i Fyfyrwyr sy’n cael eu rhoi iddynt ar ddechrau pob blwyddyn academaidd. Mae canllawiau cyfeirnodi cynhwysfawr ar gael o'r llyfrgell drwy'r ddolen ganlynol: http://libguides.swansea.ac.uk. Ni chaiff anwybodaeth o'r confensiynau ei derbyn fel esgus dilys.
Nid yw'r Brifysgol yn gwahardd offer AI Cynhyrchiol yn awtomatig. Fodd bynnag, os ydych chi'n defnyddio AI Cynhyrchiol yn eich gwaith, rhaid i chi ddilyn y cyfarwyddiadau a roddwyd ar gyfer eich asesiad penodol a chydnabod yn glir sut y cafodd ei ddefnyddio. Os caiff cynnwys a gynhyrchwyd gan AI ei gynnwys heb gydnabyddiaeth, gellir ystyried hyn yn gamymddygiad academaidd. Mewn achosion bychan iawn, lle mae'r defnydd yn gyfyngedig neu heb fod yn ganolog i'r asesiad, gellir delio ag ef drwy'r broses farcio, gan arwain at farc is yn hytrach na chosb ffurfiol.
Lle caniateir defnyddio AI Cynhyrchiol, efallai y disgwylir i chi gynnwys y nodiadau a ddefnyddiwyd a dangos yn glir ble mae'r offeryn wedi cyfrannu at eich gwaith.
Mae hyn yn digwydd pan fydd dau fyfyriwr neu fwy yn gweithio gyda'i gilydd heb ganiatâd ac yn cyflwyno gwaith tebyg fel pe bai'n waith llwyr ganddyn nhw. Mae hefyd yn cynnwys sefyllfaoedd lle gall rhannu eich data, deunyddiau, cynlluniau neu waith cwrs arall â rhywun sydd wedyn yn ei gyflwyno heb eich gwybodaeth na'ch caniatâd – hyd yn oed os nad dyna oedd y bwriad gwreiddiol – arwain at atgyfeiriad am gamymddygiad academaidd.
Comisiynu yw'r weithred o dalu am neu drefnu i rywun arall lunio gwaith, p'un a yw hwn wedyn yn cael ei gyflwyno i'w asesu ai peidio, fel pe bai'n waith eich hun. Gall hyn gynnwys prynu traethodau, lawrlwytho deunyddiau o wefannau rhannu traethodau, neu drefnu i rywun arall gwblhau elfennau o'ch asesiad.
Mae ffugio data, gan gynnwys dyfeisio neu drin canlyniadau o waith labordy, gwaith maes neu ymchwil, hefyd yn gyfystyr â Chamymddygiad Academaidd.
Rhaid i'r holl waith a gyflwynir fod yn waith sy’n eiddo i chi’n llwyr, a rhaid i chi allu argyhoeddi'r rhai sy'n marcio bod hynny'n wir.
Os nad ydych yn siŵr a yw'r hyn a ddigwyddodd yn eich achos chi’n cyd-fynd ag un o'r diffiniadau hyn, cewch gyfle i drafod yr atgyfeiriad.
Yn achos gwaith cwrs, traethawd hir, traethawd ymchwil neu arholiadau ar-lein, mae'n golygu bod y staff academaidd sy'n marcio eich gwaith wedi sylwi ar rywbeth yn y gwaith a gyflwynwyd sy'n peri pryder iddynt; ac maent wedi gwneud atgyfeiriad i'r Tîm Uniondeb Academaidd. Mewn achosion o arholiadau wyneb yn wyneb gall goruchwyliwr wneud atgyfeiriad lle mae myfyrwyr wedi defnyddio eu cyfrifiannell eu hunain, wedi cyrchu nodiadau ysgrifenedig neu electronig (h.y. ar ffôn symudol), neu wedi cyfathrebu â myfyrwyr eraill sy’n sefyll yr arholiad. Mae'r atgyfeiriad wedi'i ystyried gan Swyddog Uniondeb Academaidd, sydd wedi penderfynu bod digon o dystiolaeth i'w ymchwilio ymhellach. Cyfeirir at hyn weithiau fel achos prima facie.
Yn y cyd-destun hwn, mae prima facie yn golygu'n syml, ar yr olwg gyntaf, fod achos posibl o gamymddygiad academaidd.
Ar y cam hwn, nid oes penderfyniad terfynol wedi'i wneud, a chewch gyfle bob amser i egluro sut y cafodd y gwaith ei wneud ac i roi tystiolaeth i gefnogi hyn cyn penderfynu ar unrhyw ganlyniad.
Yn y rhan fwyaf o achosion, codir y pryder gan yr academydd a farciodd eich gwaith. Gallai hefyd fod yn oruchwyliwr arholiad (os yw'r mater yn ymwneud ag arholiad) neu academydd arall sy'n ymwneud ag asesu'r gwaith.
Byddwch yn derbyn copïau o unrhyw dystiolaeth ynghyd â'r llythyr a anfonir atoch drwy e-bost. Er enghraifft, gallai hyn gynnwys adroddiad tebygrwydd drwy Turnitin, copi o'ch gwaith gyda rhannau wedi'u hamlygu, neu adroddiad arholiad (yn achos troseddau mewn arholiad).
Mae'n bwysig deall nad yw Turnitin yn “profi” llên-ladrata na chydgynllwynio ar ei ben ei hun. Mae'n dangos yn syml ble mae testun yn cyfateb i ffynonellau eraill yn ei gronfa ddata. Er enghraifft, gallai ddangos bod eich gwaith yn cyfateb i waith myfyriwr arall mewn prifysgol wahanol. Nid yw hyn yn golygu eich bod wedi cael mynediad at ei waith. Gallai olygu'n syml bod y ddau ohonoch wedi defnyddio'r un ffynhonnell wreiddiol. Yr hyn sy'n bwysig yw a gafodd y deunydd ei gyfeirnodi’n briodol.
Mae Turnitin hefyd yn aml yn amlygu tudalennau clawr, cwestiynau aseiniadau, neu ymadroddion sy'n gyffredin i'r pwnc ac y bydd pob myfyriwr yn eu defnyddio. Mae'r staff yn ymwybodol o hyn ac nid ydynt yn cynnwys y rhannau hynny wrth adolygu'r aseiniad.
Yn ogystal â meddalwedd Turnitin, bydd staff academaidd yn defnyddio amrywiaeth o ddulliau canfod wrth farcio gwaith cwrs a asesir, gan gynnwys gwirio am fformatio anarferol, newidiadau rhyfedd i'r cynllun neu'r ffont, defnydd anghyson o iaith neu derminoleg arbenigol, adrannau neu frawddegau nad ydynt yn ymwneud yn glir â'r pwnc, ac anghysondebau arddull yn y dasg ac o gymharu â gwaith blaenorol y myfyriwr.
Mae gwybodaeth am gamymddygiad academaidd, ynghyd â chanllawiau ar gyfeirnodi ac arferion academaidd da, ar gael i fyfyrwyr yn y Llawlyfrau a’r Canllawiau i Fyfyrwyr sy’n cael eu rhoi iddynt ar ddechrau pob blwyddyn academaidd. Mae canllawiau cynhwysfawr ar gyfeirnodi ar gael o'r llyfrgell drwy'r ddolen ganlynol: https://libguides.swansea.ac.uk/Hafan Ni chaiff anwybodaeth o'r confensiynau ei derbyn fel esgus dilys.
Does dim rhaid i chi fynd drwy hyn ar eich pen eich hun. Mae Canolfan Gyngor Undeb y Myfyrwyr yn cynnig cyngor annibynnol a chyfrinachol, ac mae ganddi brofiad o gefnogi myfyrwyr drwy'r broses hon. Gallwch gysylltu â nhw drwy ddilyn y ddolen hon: http://hello.swansea-union.co.uk lle gallwch agor tocyn drwy ddewis y categori – Cyngor a Chymorth o'r gwymplen. Mae ganddyn nhw gynghorwyr profiadol sy'n gallu eich helpu.
Gallwch hefyd siarad â'ch Tiwtor Personol neu eich Goruchwyliwr i gael arweiniad, yn enwedig ynghylch sut i osgoi problemau tebyg yn y dyfodol. Fodd bynnag, os ydynt yn ymwneud yn uniongyrchol â'ch achos, efallai na fyddant yn gallu cynnig cymorth llawn; yn yr achos hwn, argymhellir eich bod yn ceisio cyngor gan Undeb y Myfyrwyr.
Gall Canolfan Wasanaeth Hwb hefyd roi cymorth cyffredinol a’ch cyfeirio at y gwasanaethau cywir.
Gallwch gysylltu â thîm Hwb drwy gyflwyno cais i Hwb trwy ServiceNow, a bydd aelod o'r tîm yn ymateb ymhen 3 diwrnod gwaith. Gallwch hefyd ymweld ag un o ddesgiau gwybodaeth Hwb, sydd ar agor o ddydd Llun i ddydd Gwener rhwng 8.30am a 5.00pm yn y lleoliadau canlynol:
I lawer o fyfyrwyr, dyma eu profiad cyntaf o'r broses Camymddygiad Academaidd. Mae'n bwysig cofio mai diben y broses yw cynnal safonau academaidd a chefnogi myfyrwyr i ddeall arferion academaidd da, ond hefyd i gymhwyso cosbau lle bo hynny'n briodol.
Os oes gennych unrhyw amheuaeth o gwbl, gallwch anfon e-bost at y tîm Uniondeb Academaidd yn uniongyrchol drwy: academicintegrity@abertawe.ac.uk. Mae'r tîm yno i helpu i egluro'r broses.
Efallai y gofynnir i chi ymateb i'r honiad yn ysgrifenedig, drwy lenwi Ffurflen Ymateb Myfyriwr (Honiad o gamymddygiad academaidd: Ffurflen Ymateb Myfyriwr) sydd wedi'i llunio i gynnig awgrymiadau i lunio eich ymateb, neu efallai y gofynnir i chi ymuno â Chyfweliad Uniondeb Academaidd drwy Zoom.
Os gofynnwyd i chi ymateb yn ysgrifenedig, mae'n bwysig gwneud hynny erbyn y dyddiad cau a nodir yn eich e-bost. Dylai eich ymateb egluro'n glir eich dealltwriaeth o sut y cwblhawyd y gwaith a chynnwys unrhyw dystiolaeth ategol berthnasol. Os oedd amgylchiadau a wnaeth effeithio arnoch ar y pryd — fel salwch neu anawsterau personol — dylech sôn amdanynt a chyflwyno tystiolaeth lle bo modd. Mae Ffurflen Ymateb Myfyriwr ar gael i chi ei llenwi: Honiad o gamymddygiad academaidd: Ffurflen Ymateb Myfyriwr
Efallai yr hoffech gysylltu â Chanolfan Gyngor Undeb y Myfyrwyr drwy: http://hello.swansea-union.co.uk sy'n rhoi cyngor a chymorth annibynnol a chyfrinachol i chi wrth lenwi'r Ffurflen Ymateb Myfyriwr.
Mae cyfweliad Camymddygiad Academaidd yn gyfarfod lle gofynnir cwestiynau mwy uniongyrchol i chi am eich gwaith a sut y gwnaethoch gynllunio, ymchwilio i’r asesiad a’i gwblhau.
Byddwch yn cael hysbysiad o ddyddiad ac amser y cyfweliad, fel arfer gyda rhybudd o bum niwrnod gwaith. Gallwch naill ai ddod â drafftiau, nodiadau neu ddeunyddiau ategol eraill i ddangos sut y datblygwyd eich gwaith, neu gyflwyno'r dogfennau cyn y cyfweliad er mwyn i'r panel eu hadolygu ymlaen llaw. Gellir anfon y rhain at y Tîm Uniondeb Academaidd drwy: academicintegrity@abertawe.ac.uk.
Sylwer: Os na allwch fynd i'r cyfweliad am reswm dilys, dylech gysylltu â'r Tîm Uniondeb Academaidd cyn gynted â phosibl i drefnu'r cyfweliad ar adeg arall.
Bydd y cyfweliad fel arfer yn cael ei gynnal drwy Zoom, a bydd dau Swyddog Uniondeb Academaidd, neu'r academydd a gyfeiriodd yr achos ynghyd â Swyddog Uniondeb, yn bresennol fel arfer. Mae'n bosibl y caiff y cyfarfod ei recordio, a chymerir nodiadau a fydd yn rhan o'r Ffurflen Adroddiad Achos a ddarperir i chi ar ddiwedd y broses.
Gallwch ddod â rhywun gyda chi i’r cyfweliad. Gall hwn fod yn fyfyriwr arall o Brifysgol Abertawe, fel ffrind neu gyd-letywr, neu'n gynrychiolydd o Ganolfan Gyngor Undeb y Myfyrwyr.
Mae'n bwysig eich bod yn mynd i'r cyfweliad neu'n rhoi ymateb ysgrifenedig ymhen y terfyn amser a nodwyd. Os na fu unrhyw ymdrech i gysylltu â'r Tîm Uniondeb Academaidd, bydd penderfyniad yn cael ei wneud ynghylch eich achos ar sail y dystiolaeth sydd ar gael.
Na, nid yw'r Brifysgol yn darparu cyfieithwyr. Cynhelir cyfweliadau yn Saesneg (neu yn Gymraeg, os yw'n well gan y myfyriwr); Fodd bynnag, os oes gennych anawsterau iaith, gallwch drefnu i rywun ddod i'r cyfarfod i gyfieithu ar eich rhan, a gellid defnyddio capsiynau Zoom lle bo angen.
Unwaith y byddwch wedi anfon eich ymateb neu wedi bod i'r cyfweliad, bydd yr holl ddogfennau sy'n ymwneud â'r achos yn cael eu hadolygu gan ail Swyddog Uniondeb Academaidd nad oedd yn rhan o'r penderfyniad cychwynnol prima facie. Mae hyn yn helpu i sicrhau bod y broses yn deg.
Bydd yr ail Swyddog Uniondeb Academaidd yn ystyried yr holl dystiolaeth yn ofalus ac yn penderfynu a yw camymddygiad academaidd wedi digwydd. Os byddant yn penderfynu na chafwyd camymddygiad academaidd, caiff yr achos ei gau, a chewch wybod yn ysgrifenedig. Ni fydd cofnod o'r atgyfeiriad ar eich Cofnod Myfyriwr.
Os bydd yn penderfynu bod camymddygiad academaidd wedi digwydd, bydd yn rhoi cosb yn unol â rheoliadau'r Brifysgol, a chaiff hyn ei esbonio yn eich llythyr canlyniad yn ogystal â'r hyn mae'n ei olygu i chi.
Mae cosbau'n amrywio gan ddibynnu ar ba mor ddifrifol yw'r achos ac a ydych chi wedi cyflawni camymddygiad academaidd o'r blaen. Gallant amrywio o ostyngiad mewn marciau i ganlyniadau academaidd mwy difrifol mewn achosion difrifol.
Cofnodir penderfyniad y canlyniad ar eich cofnod Prifysgol a bydd yn ymddangos fel AM wrth ymyl yr asesiad neu'r modiwl. Mewn rhai achosion, yn enwedig ar raglenni sydd wedi'u hachredu'n broffesiynol, gall fod goblygiadau ar gyfer cyrff proffesiynol a bydd eich Ysgol yn rhoi gwybod i chi os mai dyma'r achos.
Am ragor o wybodaeth am gosbau, gweler adran 5 o'r Gweithdrefn Camymddwyn Academaidd.
Gallwch Os bydd eich achos yn cael ei gadarnhau, bydd eich llythyr canlyniad yn esbonio sut i wneud cais am Adolygiad Terfynol. Mae gennych 14 diwrnod gwaith o ddyddiad eich llythyr canlyniad i gyflwyno Adolygiad Terfynol.
Mae sail benodol dros gyflwyno apêl; mae rhagor o fanylion i'w cael yn adran 1.3 o'r Gweithdrefn Adolygiad Terfynol.
Os yw achos o gamymddygiad academaidd yn eich erbyn wedi'i brofi o'r blaen, bydd y broses yn aros yr un fath. Fodd bynnag, mae'n debygol y bydd troseddau mynych yn arwain at gosbau mwy difrifol.
Os oes cwestiynau gennych chi o hyd ar ôl i chi ddarllen y canllawiau hyn, gallwch chi gysylltu â'r Tîm Uniondeb Academaidd drwy e-bostio: academic integrity@abertawe.ac.uk a byddant yn gwneud eu gorau i sicrhau eglurhad a chymorth pellach.
