Gwneud yn fawr o'ch taith yrfa ôl-raddedig

Nid dim ond chwilio am swydd yw rhwydweithio. Gall cysylltu â phobl sy'n gweithio mewn meysydd sydd o ddiddordeb i chi eich helpu i ddeall llwybrau gyrfa gwahanol, darganfod cyfleoedd a meithrin hyder wrth siarad am eich sgiliau a'ch profiad. 

Edrychwch am ddigwyddiadau cyflogwyr, ffeiriau gyrfaoedd, cynadleddau, seminarau a digwyddiadau proffesiynol ar gyfer eich pwnc. Gallwch hefyd ddefnyddio LinkedIn a rhwydweithiau proffesiynol i ddilyn sefydliadau, ymuno â sgyrsiau a dysgu am ddatblygiadau yn eich sector. Os ydych chi'n ymchwilydd, gall eich rhwydweithiau academaidd ac ymchwil fod yn arbennig o werthfawr - meddyliwch am gynadleddau, cyrff proffesiynol a phobl rydych chi'n cwrdd â nhw drwy eich gwaith ymchwil.

Mae eich profiad ôl-raddedig yn rhoi mwy na gwybodaeth am bwnc i chi.  Meddyliwch am y sgiliau rydych chi'n eu datblygu drwy ymchwil, prosiectau, cyflwyniadau, datrys problemau, rheoli eich amser, gweithio'n annibynnol a chydag eraill. Mae gallu adnabod y sgiliau hyn – ac esbonio sut rydych chi wedi eu defnyddio nhw – yn gallu gwneud byd o wahaniaeth wrth gyflwyno cais am gyfleoedd.

Os ydych chi'n ymchwilydd ôl-raddedig, peidiwch â dibrisio gwerth eich profiad ymchwil.    Mae'r gallu i ddadansoddi gwybodaeth gymhleth, rheoli prosiect hirdymor, cyfleu syniadau a datblygu arbenigedd yn werthfawr mewn gyrfaoedd yn y byd academaidd a'r tu hwnt.

Gallwch fyfyrio ar y sgiliau rydych chi wedi'u datblygu gan ddefnyddio'r modiwl Hunanymwybyddiaeth ar ein Cwrs Datblygu Gyrfa neu rhowch gynnig ar ar Job Teaser i weld sut mae eich sgiliau'n cyd-fynd â swyddi a sectorau gwahanol.

Does dim angen i chi gael eich gyrfa gyfan wedi'i chynllunio. Dechreuwch drwy archwilio posibiliadau, siarad â phobl a rhoi cynnig ar bethau newydd.  Edrychwch am gyfleoedd i gael profiad perthnasol, datblygu sgiliau newydd a phrofi eich syniadau am yrfaoedd gwahanol.

Gall ein tîm Gyrfaoedd a Chyflogadwyedd eich helpu ar bob cam o'r ffordd.  Fel myfyriwr ôl-raddedig neu ymchwilydd, gallwch drefnu apwyntiad unigol  gydag Ymgynghorydd Gyrfaoedd, gweithio drwy'r Cwrs Datblygu Gyrfa, archwilio cyfleoedd ar Job Teaser, mynd i ddigwyddiadau cyflogwyr a chyrchu offer ar gyfer CVs, ceisiadau a chyfweliadau.