Polisi ar ddefnyddio Deallusrwydd Artiffisial (AI) wrth Asesu Myfyrwyr

Mae'r polisi hwn yn amlinellu'r arweiniad a'r egwyddorion ar gyfer defnyddio cymwysiadau Deallusrwydd Artiffisial (AI) gan gynnwys deallusrwydd artiffisial cynhyrchiol, mewn asesiadau a rhaglenni ym Mhrifysgol Abertawe. Nod y polisi hwn yw hyrwyddo defnyddio Deallusrwydd Artiffisial mewn modd moesegol, tryloyw a theg, gan sicrhau bod ei fanteision posib yn cael eu defnyddio wrth leihau'r risgiau a'r heriau cysylltiedig o ran cynnal safonau.

Mae'r polisi hwn yn berthnasol i bob aelod  staff y cyfadrannau, myfyrwyr a holl staff y gwasanaethau proffesiynol sy'n rhan o waith asesu a/neu'r defnydd o dechnolegau deallusrwydd artiffisial yn y Brifysgol a'i rhaglenni. 

Rhennir cyngor ac arweiniad sy'n seiliedig ar dystiolaeth â rhanddeiliaid. I fyfyrwyr Arweiniad ar Ddeallusrwydd Artiffisial - Prifysgol Abertawe i staff Arweiniad Uwch ar Ddeallusrwydd Artiffisial (AI) i staff - Prifysgol Abertawe

Mae'r polisi'n cefnogi gweledigaeth a diben strategol y Brifysgol Gweledigaeth ac uchelgais - Prifysgol Abertawe “galluogi atebion lleol i'r heriau byd-eang sy'n effeithio ar bawb”.

1. Bydd Prifysgol Abertawe'n gweithio mewn partneriaeth â myfyrwyr ac yn cefnogi myfyrwyr a staff i fod yn hyddysg mewn Deallusrwydd Artiffisial.
2. Mae Prifysgol Abertawe'n ymddiried yn ei myfyrwyr i ddefnyddio Deallusrwydd Artiffisial mewn modd moesegol a thryloyw.
3. Rhoddir y sgiliau y mae eu hangen ar staff i gefnogi myfyrwyr i ddefnyddio offer Deallusrwydd Artiffisial cynhyrchiol yn effeithiol ac yn briodol yn ystod eu profiad dysgu.
4. Bydd Prifysgol Abertawe'n addasu addysgu ac asesu i ymgorffori defnydd moesegol o Ddeallusrwydd Artiffisial cynhyrchiol a chefnogi mynediad cyfartal.
5. Bydd Prifysgol Abertawe'n sicrhau bod trylwyredd, uniondeb a safonau academaidd yn cael eu cynnal.
6. Bydd Prifysgol Abertawe'n cydweithredu i rannu arfer da wrth i'r dechnoleg a'i chymwysiadau ym myd addysg ddatblygu.
   (wedi'u mabwysiadu o Egwyddorion Grŵp Russell ar ddefnyddio offer Deallusrwydd Artiffisial cynhyrchiol ym myd addysg)

i. Mae'n Rhaid i holl ddefnyddwyr cymwysiadau deallusrwydd artiffisial yn y Brifysgol a'i rhaglenni lynu wrth yr egwyddorion moesegol, parchu hawliau dynol, a diogelu data.

ii. Dylai’r defnydd o Ddeallusrwydd Artiffisial gyd-fynd â chenhadaeth, gwerthoedd a nodau academaidd y Brifysgol, gan gefnogi swyddogaethau addysgu, dysgu, ymchwil a gweinyddu.

iii. Ni ddylai ymagweddau sy'n cynnwys defnyddio systemau Deallusrwydd Artiffisial wahaniaethu yn erbyn unigolion neu grwpiau ar sail nodweddion sy'n cael eu gwarchod gan y gyfraith, megis hil, rhywedd, ethnigrwydd, crefydd, anabledd neu statws economaidd-gymdeithasol.

iv. Ni chaniateir i staff a myfyrwyr gyflwyno gwaith a gwblhawyd gan gymwysiadau Deallusrwydd Artiffisial fel eu gwaith eu hunain heb gydnabod y ffaith.

i. Dylai'r holl gymwysiadau deallusrwydd artiffisial a ddefnyddir gan y Brifysgol a'i rhaglenni fod yn dryloyw ac yn hygyrch i bawb. Dylai defnyddwyr fod â dealltwriaeth glir o sut mae systemau deallusrwydd artiffisial yn gwneud penderfyniadau a'r algorithmau sy'n sail i hyn, gan gynnwys y risgiau, y cyfyngiadau a'r tueddiadau yn yr algorithmau hyn..

ii. Anghywirdeb gwybodaeth: mae offer Deallusrwydd Artiffisial cynhyrchiol yn casglu gwybodaeth o amrywiaeth eang o ffynonellau ac mae rhai o'r rhain yn anghywir, yn cynnwys camwybodaeth neu'n anghyflawn. Gall y mewnbynnau a'r gorchmynion gan ddefnyddwyr fod yn aneglur neu'n anghywir. Felly, mae hyn yn golygu y gall canlyniadau ac allbynnau sy'n deillio o offer Deallusrwydd Artiffisial cynhyrchiol fod yn anghywir, yn amherthnasol neu'n gamarweiniol. Dylai defnyddwyr bob amser sicrhau cywirdeb y canlyniadau sy'n deillio o offer Deallusrwydd Artiffisial cynhyrchiol.

iii.  Bydd monitro gweithredol a lliniaru tuedd mewn systemau deallusrwydd artiffisial a'u defnydd yn y Brifysgol a'i rhaglenni i sicrhau tegwch ac atal gwahaniaethu

iv. Bydd y brifysgol yn darparu'r addasiadau a'r gefnogaeth angenrheidiol i sicrhau bod mynediad teg at adnoddau a gwasanaethau sy'n seiliedig ar Ddeallusrwydd Artiffisial.

i. Rhaid i unrhyw ddefnydd o gymwysiadau Deallusrwydd Artiffisial gydymffurfio â’r Rheoliadau Cyffredinol ar Ddiogelu Data perthnasol (GDPR).

ii. Ni ddylai staff na myfyrwyr fewnbynnu gwybodaeth adnabyddadwy i unrhyw gymhwysiad Deallusrwydd Artiffisial.

iii. Dylid ceisio'r caniatâd priodol cyn caffael unrhyw ddata sy'n cael ei gasglu a/neu ei ddadansoddi gan systemau Deallusrwydd Artiffisial i sicrhau preifatrwydd a chyfrinachedd.

iv. Ni chaniateir i staff na myfyrwyr lanlwytho asesiad myfyriwr neu unrhyw ddata adnabyddadwy heb ganiatâd ysgrifenedig penodol, i gymwysiadau Deallusrwydd Artiffisial am unrhyw reswm (gan gynnwys ymdrechion i wirio am gynnwys sydd wedi'i gynhyrchu gan Ddeallusrwydd Artiffisial).

i. Bydd y Brifysgol yn caniatáu defnyddio cymwysiadau Deallusrwydd Artiffisial mewn asesiadau lle bydd hyn yn briodol ac yn berthnasol i wella dysgu myfyrwyr.

ii. Dylunnir asesiadau i sicrhau bod uniondeb a safonau'n cael eu cynnal pan fydd gan fyfyrwyr fynediad at Ddeallusrwydd Artiffisial cynhyrchiol, heb aberthu pwysigrwydd na dilysrwydd asesu ac arfer addysgegol.

iii. Bydd y Polisi Asesu, Marcio ac Adborth, y Polisi Prawf-ddarllen a'r Polisi Camymddygiad Academaidd yn cyfeirio at ddefnydd priodol o Ddeallusrwydd Artiffisial mewn asesiad, gan esbonio risgiau a chanlyniadau defnydd amhriodol i fyfyrwyr.

i. Caiff hawliau eiddo deallusol mewn perthynas â gwaith a gynhyrchir yn gyflawn neu'n rhannol gan ddeallusrwydd artiffisial eu hegluro a'u diffinio gan Bolisïau Eiddo Deallusol y Brifysgol.

Darperir hyfforddiant, cymorth a chyfleoedd am ddatblygiad proffesiynol i staff a myfyrwyr sy'n datblygu, cyflwyno neu ddefnyddio technolegau Deallusrwydd Artiffisial gan y Brifysgol.

Dylai hyfforddiant ganolbwyntio ar hyrwyddo defnydd effeithiol, ymwybyddiaeth o ystyriaethau moesegol, preifatrwydd data, bias algorithmig a phynciau perthnasol eraill.

Os bydd unigolyn yn methu cydymffurfio â'r polisi hwn, rhoddir gwybod am hyn i'r Bwrdd Rheoliadau, Ansawdd a Safonau.

Yn y cyfamser, oherwydd cyfradd y newidiadau yn y maes hwn, mae'n debygol y bydd y polisi hwn yn cael ei ddiweddaru’n aml i gynnal safonau.

Caiff y polisi hwn ei adolygu'n ffurfiol o leiaf unwaith bob blwyddyn.