Rheoliadau penodol ar gyfer rhaglenni Meistr ar y cyd Prifysgol Abertawe a’r INDIAN INSTITUTE OF TECHNOLOGY MADRAS (iitm) - 180 credyd Prifysgol Abertawe/198 credyd IITM
Bydd y Rheoliadau Penodol canlynol yn berthnasol i bob myfyriwr sy'n ymgymryd â rhaglen radd ôl-raddedig ar y cyd a ddyfernir gan Brifysgol Abertawe a’r Indian Institute of Technology Madras (IITM).
*DIFFINIAD: Dysgu Annibynnol dan Gyfarwyddyd
Diffinnir dysgu annibynnol dan gyfarwyddyd fel darn unigol, neu sawl darn, o ddysgu hunangyfeiriedig (a wneir dan gyfarwyddyd goruchwylydd) sy'n cynnig cyfanswm o 60 credyd Prifysgol Abertawe/80 credyd IITM, sy'n darparu cyfle i ymgymryd ag ymchwil estynedig i un agwedd neu fwy ar faes llafur y rhaglen. Gall y dysgu annibynnol dan gyfarwyddyd fod ar sawl ffurf, a ddewisir i gydweddu orau â'r rhaglen a/neu i wella rhagolygon cyflogadwyedd y myfyrwyr. Gellir diffinio hyn wrth gymeradwyo'r rhaglen, a bydd yn gyfwerth â'r ymdrech angenrheidiol i baratoi traethawd hir o hyd at 20,000 o eiriau.
Graddau Meistr Ôl-raddedig a Addysgir
1.Cyflwyniad
Bydd y rheoliadau hyn yn berthnasol i'r rhaglenni sy'n arwain at ddyfarnu MSc.
1.1
Caiff graddau Meistr a Thystysgrifau a Diplomâu Ôl-raddedig eu dyfarnu i fyfyrwyr sydd wedi dangos:
-
- Dealltwriaeth systematig o wybodaeth, ac ymwybyddiaeth feirniadol o broblemau cyfredol a/neu fewnwelediadau newydd, sydd i raddau helaeth ar flaen y gad yn y ddisgyblaeth academaidd, maes astudio neu faes arfer proffesiynol dan sylw neu'n cael eu llywio gan y gwaith hwnnw.
- Dealltwriaeth gynhwysfawr o'r technegau sy'n berthnasol i'w hymchwil eu hunain neu i ysgolheictod uwch.
- Gwreiddioldeb wrth gymhwyso gwybodaeth, ynghyd â dealltwriaeth ymarferol o sut y defnyddir technegau ymchwil ac ymholi i greu a dehongli gwybodaeth o fewn y ddisgyblaeth.
- Dealltwriaeth gysyniadol sy'n galluogi'r myfyriwr:
- i werthuso ymchwil gyfredol ac ysgolheictod uwch mewn ffordd feirniadol o fewn y ddisgyblaeth;
- i werthuso methodolegau a datblygu beirniadaeth ohonynt, a lle bo'n briodol, gynnig damcaniaethau newydd
Yn nodweddiadol, bydd deiliaid y cymhwyster yn gallu gwneud y pethau canlynol:
-
- Ymdrin â materion cymhleth yn systematig ac yn greadigol, gwneud penderfyniadau doeth yn absenoldeb data cyflawn, a mynegi casgliadau yn glir i gynulleidfaoedd arbenigol a rhai nad ydynt yn arbenigwyr.
- Dangos hunangyfeirio a gwreiddioldeb wrth ymdrin â phroblemau a'u datrys, a gweithio'n annibynnol i gynllunio a chynnal tasgau ar lefel broffesiynol neu gyfatebol.
- Parhau i ddatblygu eu gwybodaeth a'u dealltwriaeth, a datblygu sgiliau newydd i lefel uchel.
A bydd gan y deiliaid:
-
- Y nodweddion a'r sgiliau trosglwyddadwy angenrheidiol ar gyfer cyflogaeth sy'n gofyn am:
- arfer mentergarwch a chyfrifoldeb personol;
- gwneud penderfyniadau mewn sefyllfaoedd cymhleth nad oes modd eu darogan;
- y gallu i ddysgu’n annibynnol sy’n ofynnol er mwyn sicrhau datblygu proffesiynol parhaus.
2. Strwythur y Rhaglen
2.1
Mae rhaglenni Meistr a Addysgir ar y Cyd Prifysgol Abertawe ac IITM wedi'u strwythuro fel a ganlyn:
Rhaglen astudio amser llawn sy'n cynnwys modiwlau sy'n dod i gyfanswm o 180 credyd Prifysgol Abertawe/198 credyd IITM, gyda 120 credyd Prifysgol Abertawe/118 credyd IITM o fodiwlau a addysgir yn Rhan Un a 60 credyd Prifysgol Abertawe/80 credyd IITM o ddysgu annibynnol dan gyfarwyddyd yn Rhan Dau.
2.2
Ni chaniateir i fyfyrwyr ddilyn mwy na 120 credyd Prifysgol Abertawe/ 118 credyd IITM yn Rhan Un.
2.3
Fel arfer, bydd Rhan Un yn cael ei chwblhau yn y 9 mis/2 semester cyntaf, gyda myfyrwyr yn ymgymryd â Rhan Dau yn ystod misoedd 9 i 18/y 2 semester canlynol.
2.4
Bydd deilliannau dysgu’n cael eu nodi ar gyfer pob rhaglen gradd Meistr ac unrhyw raglen y bwriedir iddi ddarparu cymhwyster canolraddol neu gymhwyster wrth gefn.
3. Terfynau Amser
3.1
Bydd modiwlau a addysgir yn cael eu cwblhau fel y rhagnodir gan y Gyfadran/Ysgol berthnasol a dylid cwblhau asesiadau erbyn y dyddiadau a bennir gan Gyfadrannau/Ysgolion. Caiff y rhaglen radd gyfan ei chwblhau o fewn y terfynau amser canlynol o'r dyddiad cofrestru gwreiddiol:
| Dull astudio |
|
| Myfyrwyr amser llawn |
dim llai na 18 mis/4 semester a dim mwy na 2 flynedd*/6 semester |
3.2
Fel arfer, rhaid i fyfyrwyr gwblhau astudiaethau Rhan Un erbyn y dyddiadau cau canlynol oni bai bod amseroedd eraill yn cael eu cymeradwyo ar gyfer rhaglen benodol gan y Bwrdd Academaidd ar y Cyd mewn cytundeb â'r ddau Gyfarwyddwr Rhaglen.
Myfyrwyr amser llawn - diwedd y 12fed mis neu, os cymerir arholiadau atodol, erbyn 16eg mis yr ymgeisyddiaeth.
3.3
Ni chaiff myfyriwr sy'n methu â chwblhau Rhan Un o fewn y cyfnod a nodir fynd ymlaen i Ran Dau o'r rhaglen oni bai bod estyniad wedi'i gytuno a’i awdurdodi'n ffurfiol ar gyfer y cyfnod cwblhau Rhan Un neu oni bai bod y Bwrdd Dilyniant a Dyfarniadau wedi cytuno ar ddilyniant dros dro, yn amodol ar gwblhau cyfleoedd atodol y cytunwyd arnynt ar gyfer unrhyw fodiwlau a fethwyd. Heb estyniad awdurdodedig neu ddilyniant dros dro cytunedig, dim ond ar gyfer y cymhwyster ymadael priodol mae'r myfyriwr yn gymwys. Dylid nodi na fydd estyniad o’r fath yn ymestyn cyfnod astudio’r rhaglen gyfan yn awtomatig.
4. Estyniad i’r Dyddiad Cau ar gyfer Cyflwyno
4.1
Rhaid cwblhau ceisiadau am estyniad i'r dyddiad cau ar gyfer cyflwyno'r darn/darnau o ddysgu annibynnol dan gyfarwyddyd yn unol â rheoliadau'r sefydliad lletyol ar gyfer y modiwl hwnnw a rhaid eu cyfeirio trwy oruchwylydd yr ymgeisydd i'r Bwrdd Academaidd ar y Cyd yn unol â'r dyddiadau cau a nodwyd.
5. Strwythur Addysgu ac Asesu
5.1
Amlinellir y patrwm addysgu ar gyfer y rhaglenni hyn yng nghanllawiau'r rhaglen.
6. Rheoliadau Asesu
6.1
Bydd gofyn i fyfyrwyr gwblhau'r rhaglen astudio yn unol â'r rheoliadau ar gyfer dyfarnu credydau fel y'u cyhoeddir yn Rheoliadau Asesu Graddau Meistr a Addysgir ar y Cyd Prifysgol Abertawe ac IITM.
6.2
Rhaid i'r marc pasio ar gyfer modiwl fod yn 50% (o fewn graddfa Prifysgol Abertawe) neu'n amrywiol fesul modiwl, ar gyfer IITM.
6.3
Rhaid i fyfyrwyr basio Rhan Un y rhaglen astudio yn llwyddiannus cyn cael caniatâd i symud ymlaen yn ffurfiol i Ran Dau ac i fod yn gymwys ar gyfer y dyfarniad arfaethedig.
Bydd y dysgu annibynnol dan gyfarwyddyd yn ymgorffori dulliau a chanlyniadau prosiect ymchwil.
6.4
Rhaid i fyfyriwr gwblhau dwy ran y rhaglen yn llwyddiannus cyn y gall fod yn gymwys i ennill gradd.
7. Cymwysterau Ymadael
7.1
Gall myfyriwr a gaiff ei dderbyn i raglen gradd Meistr, ond nad yw’n gallu, neu nad yw’n cael, symud ymlaen i’w chwblhau, gymhwyso ar gyfer un o’r dyfarniadau a ganlyn gan y Brifysgol, yn dibynnu ar nifer y credydau a enillodd erbyn iddo ymadael:
|
Tystysgrif Ôl-raddedig
|
Pasio 60 credyd a addysgir gan Brifysgol Abertawe/45 credyd a addysgir gan IITM yn Rhan Un (gyda 50% (Prifysgol Abertawe)/ gradd pasio neu uwch gan IITM)
|
|
Diploma Ôl-raddedig
|
Dilyn 120 credyd a addysgir gan Brifysgol Abertawe/118 credyd a addysgir gan IITM a chymhwyso i fynd ymlaen i Ran Dau.
|
7.2
Dim ond os yw'r modiwlau perthnasol yn cyfrif fel rhaglen gymeradwy y bydd Tystysgrif Ôl-raddedig a enwir ar gael, ar ôl i fyfyriwr gwblhau modiwlau sy'n cynnig dim llai na 60 credyd Prifysgol Abertawe/45 credyd IITM ar Lefel 7. Bydd cymeradwyaeth i raglen dystysgrif yn cael ei wneud gan y Bwrdd Dilyniant a Dyfarniadau ar y Cyd perthnasol yn unol â’r rheoliad hwn.
8. Rhan Dau - dysgu annibynnol dan gyfarwyddyd (60 credyd Prifysgol Abertawe/80 credyd IITM).
8.1
Cwblheir pob ymgeisyddiaeth trwy gyflwyno darn neu ddarnau o ddysgu annibynnol dan gyfarwyddyd, a chael cymeradwyaeth i’r fath waith gan yr arholwyr.
8.2
Caiff ymgeiswyr ddechrau gwaith rhagarweiniol ar y dysgu annibynnol dan gyfarwyddyd yn ystod Rhan Un y rhaglen, ond ni chânt gyflwyno'r gwaith tan ar ôl iddynt lwyddo yn Rhan Un.
8.3
Ar ôl cyflwyno'r asesiad(au) dysgu annibynnol dan gyfarwyddyd, bydd myfyrwyr yn sefyll arholiad viva voce yn y sefydliad lletyol.
9. Goruchwylio'r dysgu annibynnol dan gyfarwyddyd
9.1
Ar gyfer y rhaglenni MSc Deunyddiau a Gweithgynhyrchu ac MSc Peirianneg Gynaliadwy, gall myfyrwyr ymgymryd â'r dysgu annibynnol dan arweiniad naill ai ym Mhrifysgol Abertawe (ar gyfer Llwybr 1) neu IITM (ar gyfer Llwybr 2). Bydd yr holl fyfyrwyr yn cael eu goruchwylio ar y cyd gan staff o Brifysgol Abertawe ac IITM.
Bydd goruchwylwyr yn goruchwylio prosiect ymchwil a gwaith paratoi traethawd hir pob myfyriwr. Rhaid i oruchwylwyr fod wedi'u henwebu a'u cymeradwyo gan y ddau sefydliad ar gyfer pob traethawd hir neu bwnc ymchwil, gyda dyletswyddau goruchwylio wedi'u rhannu'n briodol. Bydd goruchwylwyr yn cael eu dewis yn seiliedig ar eu harbenigedd yn y maes cynnwys perthnasol a'r ddisgyblaeth berthnasol, a byddant yn adolygu cynnydd y myfyriwr ar y cyd ac yn rheolaidd. Bydd y prif oruchwylydd wedi'i leoli yn y sefydliad lletyol ar gyfer y modiwl dysgu annibynnol dan gyfarwyddyd a bydd y goruchwylydd eilaidd wedi'i leoli yn y sefydliad partner.
9.2
Bydd myfyrwyr yn cael eu goruchwylio yn unol â'r polisi goruchwylio neu'r dull goruchwylio ar gyfer y sefydliad lletyol. Ar gyfer Prifysgol Abertawe, enw’r polisi yw’r Polisi Goruchwylio ar gyfer Myfyrwyr Meistr a Addysgir Ôl-raddedig.
10. Cyfrifoldebau'r Bartneriaeth
10.1
Dylai cynigion fod yn ymarferol o ran amserlen ac o ran yr adnoddau sydd ar gael, a dylid penodi goruchwylwyr ag arbenigedd addas ar eu cyfer.
10.2
Dylid caniatáu digon o amser i oruchwylwyr gyflawni eu dyletswyddau, yn enwedig os oes nifer fawr o ymgeiswyr.
10.3
Dylid dilyn arweiniad y Cyngor Ymchwil, pan fo hynny’n briodol, ynghylch y cyfleusterau a ddylai fod ar gael (gofod astudio, llyfrgell, amgylchedd ymchwil priodol, etc).
10.4
Canllawiau ysgrifenedig i'w cyhoeddi mewn perthynas â phresenoldeb/ymgysylltiad, fframweithiau ar gyfer cyfarfodydd a disgwyliadau cyffredinol, yn unol â pholisi neu ddull y sefydliad lletyol, er enghraifft, Polisi Goruchwylio Prifysgol Abertawe ar gyfer Myfyrwyr Meistr Ôl-raddedig ar y Cyd ar Raglenni Partneriaeth Cydweithredol.
10.5
Caiff y modd y gweithredir yr holl ganllawiau hynny ei fonitro'n rheolaidd.
10.6
Os bydd angen help ychwanegol ar fyfyrwyr gyda’u sgiliau iaith, dylid darparu’r cyngor hwnnw fel gwasanaeth sydd ar wahân i ddyletswyddau’r goruchwylydd.
10.7
Dylai fod system ar waith sy’n galluogi myfyriwr i ofyn am oruchwylydd gwahanol, ac sy’n sicrhau bod aelod gwahanol o staff ar gael pe bai'r naill oruchwylydd neu'r llall yn absennol am gyfnod hir.
10.8
Dylai nifer y myfyrwyr y mae goruchwylydd yn eu goruchwylio fod yn ddigon isel i’w alluogi i gyflawni’r cyfrifoldebau a nodir yn Adran 11.
11. Cyfrifoldebau'r Goruchwylwyr
11.1
Dylid rhoi cyngor ac arweiniad i’r myfyriwr gyda’r nod o hwyluso’r broses o gynhyrchu darn o waith sydd o’r safon ofynnol ar gyfer gradd Meistr a Addysgir.
11.2
Mae'r cynnig i fod o fewn meysydd arbenigedd y goruchwylwyr, a dylid diffinio’r pwnc a ddewisir mewn ymgynghoriad â'r myfyriwr a'i gymeradwyo gan Gyfarwyddwyr y Rhaglen yn y Bartneriaeth.
11.3
Dylai fod modd cwblhau’r gwaith a gynigir o fewn y cyfnod a bennir.
11.4
Dylid cytuno ar amserlen ar gyfer cyflwyno gwaith yn unol â dyddiadau cau’r rhaglen.
11.5
Dylid cynnal o leiaf dri chyfarfod yn unol â Pholisi Goruchwylio Prifysgol Abertawe ar gyfer Myfyrwyr Meistr Ôl-raddedig ar y Cyd ar Raglenni Partneriaeth Cydweithredol ar gyfer myfyrwyr sy'n ymgymryd â'r modiwl dysgu annibynnol dan gyfarwyddyd ym Mhrifysgol Abertawe.
11.6
Dylid cytuno ar gofnod o bob cyfarfod o'r fath gyda'r myfyriwr, gan gynnwys dyddiadau, camau gweithredu a gytunwyd, a dyddiadau cau a bennwyd. Bydd y cofnod yn cael ei gynnal gan y myfyriwr a'i gyflwyno i Gyfarwyddwyr y Rhaglen ar ôl cyflwyno'r gwaith trwy'r broses gyflwyno a amlinellir yng nghanllawiau'r rhaglen.
11.7
Dylai gwaith gael ei ddychwelyd yn unol â’r dyddiadau cau a nodwyd, a dylid rhoi sylwadau adeiladol arno.
11.8
Rhoddir sesiwn adborth i unrhyw fyfyriwr sy’n methu yn ogystal â chaniatâd gan y Bwrdd Dilyniant a Dyfarniadau i ailgyflwyno’r gwaith.
12. Cyfrifoldebau'r Myfyriwr
12.1
Yn anad dim, dylai’r gwaith a gynhyrchir fod yn waith y myfyriwr ei hun, er ei fod wedi’i gyflawni â chyngor ac arweiniad gan y Goruchwylwyr.
12.2
Disgwylir i fyfyrwyr amser llawn yn Rhan Dau fod yn bresennol yn y sefydliad lletyol (naill ai Prifysgol Abertawe neu IITM) yn ystod Rhan Dau o'r Rhaglen (cyfeiriwch at bwynt 1.3 o Bolisi Goruchwylio Prifysgol Abertawe ar gyfer Myfyrwyr Meistr Ôl-raddedig ar y Cyd ar Raglenni Partneriaeth Cydweithredol).
12.3
Dylid cytuno ar amserlen ar gyfer cyflwyno gwaith yn unol â dyddiadau cau'r rhaglen.
12.4
Dylai myfyrwyr sy'n ymgymryd â'r modiwl dysgu annibynnol dan gyfarwyddyd ym Mhrifysgol Abertawe fynychu o leiaf dri chyfarfod yn unol â Pholisi Goruchwylio Prifysgol Abertawe ar gyfer Myfyrwyr Meistr a Addysgir Ôl-raddedig ar y Cyd ar Raglenni Partneriaeth Cydweithredol.
12.5
Dylid cadw cofnod gofalus o bob cyfarfod ffurfiol, a fydd yn cynnwys dyddiadau, y camau gweithredu y cytunwyd arnynt a’r dyddiadau cau a bennwyd, a dylai’r goruchwylydd a’r ymgeisydd gytuno ar y cofnod hwnnw. Yn unol â Pholisi Goruchwylio Prifysgol Abertawe ar gyfer myfyrwyr Meistr a Addysgir Ôl-raddedig ar y Cyd ar Raglenni Partneriaeth Cydweithredol, dylid cyflwyno copi o'r cofnod hwn i Gyfarwyddwyr y Rhaglen pan gyflwynir y gwaith ar gyfer myfyrwyr sy'n ymgymryd â'r modiwl dysgu annibynnol dan gyfarwyddyd ym Mhrifysgol Abertawe.
12.6
Dylid cysylltu â’r goruchwylwyr os tybir bod angen cyfarfodydd ychwanegol.
12.7
Dylid cwblhau’r gwaith o fewn y fframwaith y cytunwyd arno, a dylid ysgrifennu at y goruchwylydd cyn gynted ag y bo modd i’w hysbysu am unrhyw broblem sy’n ymwneud â chyflwyno gwaith yn hwyr (neu gyflwyno gwaith anfoddhaol).
